نئی دہلی : بھارتی میڈیا نے دعویٰ کیا ہے کہ بھارت نے سیکریٹری خارجہ سطح پر مذاکرات کے علاوہ مسائل حل کرنے کے لئےعلیحدہ بات چیت کی پاکستان کو دعوت دی ہے۔ بھارتی ٹی وی کے مطابق سیکریٹری خارجہ سطح کے علاوہ ہونے والے مذاکرات میں دہشت گردی اوراس سے متعلق مسائل کوبنیادی حیثیت حاصل ہوگی جبکہ انسانی مسائل سے متعلق معاملات، اعتماد سازی کے اقدامات اورتجارت پربھی بات چیت کی جائے گی بھارتی میڈیا کا کہنا ہے کہ بھارت نے اضافی مذاکرات کیلئے پاکستان کو 18 یا 25 فروری کومذاکرات کی دعوت دی ہے۔ جبکہ وزیر خارجہ شاہ محمود قریشی نے بھارت کی طرف سے مذاکرات کی پیشکش کو سفارتی فتح قرار دیا ہے ۔ مذاکرات میں کشمیر سمیت تمام ایشوز پر بات کی جائے گی۔ شاہ محمود قریشی نے کہا ہے کہ وعدہ کرتے ہیں کہ دباوٴ میں آئے بغیر پاکستان کا مقدمہ لڑیں گے۔ بھارت کے سامنے نہیں جْھکیں گے۔ شاہ محمود قریشی نے بتایا کہ وزارت خارجہ میں بدھ کو اجلاس ہوگا۔ جس میں نئی دلی میں پاکستانی ہائی کمشنر شاہد ملک بھارتی موقف پر بریفنگ دینگے۔ اجلاس میں دونوں جانب سے تجاویز سامنے رکھی جائیں گی اور بات چیت کا لائحہ عمل طے کیا جائے گا۔ ایک طرف بھارت مذاکرات کی پیشکش کررہا ہے تو دوسری طرف الزامات بھی لگا رہا ہے جس سے اس کی سنجیدگی کا اندازہ لگایا جاسکتا ہے۔ نئی دہلی میں میڈیا سے بات چیت میں بھارتی وزیر داخلہ چدم برم نے برسوں پرانا الزام پھر دہرایا ہے کہ پاکستان، سکھ خالصہ تحریک کو ہوا دے رہا ہے۔ چدم برم پاکستان کو خطرہ سمجھتے ہیں تو بھارتی وزیر اعظم من موہن، ماوٴ باغیوں، نکسل باڑیوں اور دیگر علاقائی گروپوں کو ملک تقسیم کرنے والی قوتیں قرار دیتے ہیں۔ بھارت جتنے بھی الزمات لگائے لیکن اسے یہ حقیقت تسلیم کرنا ہوگی کہ اسے اصل خطرہ حقوق سے محروم علاقائی قوتوں سے ہے۔